viernes, 1 de diciembre de 2006

Ciudadanos d´Asturies


Mañana, sábadu, a la una la tardi, sal de la estación del Norte d'Uviéu la primer manifestación que s'entama n'Asturies contra la corrupción urbanística. Van venir de dellos conceyos onde últimamente tán apaeciendo milenta asociaciones ciudadanes contra la invasión del formigón, los abusos d'especuladores y políticos o la destrucción del mediu ambiente.

La otra selmana, 15.000 persones xuntáronse na mayor manifestación de los caberos años en Xixón poles condenes que-yos cayeron a Cándido y Morala, dos sindicalistes de la Corriente Sindical d'Izquierdes qu'enxamás entuvieron lliberaos nin saben lo que ye andar con amagüestos nin combayeos en nome de los obreros que representen. Poro van camín de la cárcel, y nunca nun pisaron un conseyu d'alministración.

La de Xixón fue una manifestación contra una inxusticia y contra la represión de les llibertaes públiques, que medra pasu ente pasu; pero tamién fue un glayíu de rabia contra la corrupción y la deriva de la izquierda oficial, la del despachu y les dietes. La otra izquierda asturiana, qu'inda pisa la cai, anque ande desnortiada, fizo del «casu Cándido y Morala» un símbolu, como pasara cuantayá col casu «Dreyfus» per toa Europa.

Cada vez ye más la xente que ta fartuca de la partitocracia y de los intermediarios que dicen representanos. Los partíos nun son más qu'axencias de colocación y d'intereses, que nun son los públicos precisamente. ¿Trabayen los políticos pa meyorar la sociedá? Pues talamente paez que nmás meyora la so situación personal.

Pensar asina nun ye abrir les puertes al facismu, sinón los güeyos y ver lo que pasa. La xera nun ye desaniciar los partídos de la vida pública, sinón ponelos nel so llugar, que ye'l del interés común; y facelos competir directamente colos ciudadanos que nun quieren intermediarios col Estáu. Esto nun ye anarquismu, nin ultralliberalismu: ye, simplemente, democracia, esi sistema entafarráu por una clas social folganzana de lliberaos y funcionarios del poder.

La rebelión cívica empezó en Cataluña, onde un grupín de ciudadanos cabreaos, mayormente xente del mundu de la cultura, fundó un partíu qu'a la primer vegada que ye a presentase a les eleiciones sacó tres diputaos. La verdá ye que nun sé por qué, si quieren sustituir a los partíos monten otru; pero da-yos un toque d'atención a los convencionales ye un avance pa la ciudadanía de tol Estáu.

En Ciudadanos de Cataluña hai una gran bayura ideolóxica, pero paez que los cabezaleros lleguen mayormente de la derecha, anque lo que fai de xuntanza pa toos ye l'antinacionalismu. El prestixu de dalgunos d'estos «ciudadanos de Cataluña», como Francesc de Carrera, anima a siguilos con enfotu. Pero l'oportunismu d'otros como Arcadi Espada -esi periodista al que-y dio por calumniar al so collaciu Javier Bauluz, nun se sabe a cuentu de qué- vuelve roceannu a cualquiera.

Si per equí aparecieren unos «Ciudadanos d'Asturies», que bona falta nos faería, nun van aportar de la derecha, porque la tradición histórica y el desencantu nesta tierra vienen de la izquierda. Y serán, de xuru, asturianistes, porque n'Asturies el fundamentalismu identitariu que furrula ye l'españolista, que nun quier más llingua que la castellana nin más patria que la española.

Nun sé si veremos a estos «Ciudadanos d'Asturies» nacer y medrar, pero lo que ta nidio ye que furacu hai pa ello y una parte de la sociedá ta naguando por poder votalos. Les próximes eleiciones igual les ganen l'abstención y el votu en blanco

Xuan Cándano (La Nueva España) (01/XII/06)

C´s#: estamos al tanto, tranquilidad y paciencia.

1 comentarios:

Anónimo dijo...

¡Puxa Asturies!